Et jet vel Anekdötcher on Stötsjer, die vröjer passeert sen on die et weert sen, dat mer se opschrivt. Äver och noch heuktzedach passeren ab on zo löstig Sachen, över die et sich ze berichte luent.
Vör onjeveer dressig jor es en etlich europäisch Länder die sujenannt Sommerzit äjevoort jän. Mer wor sich alt du bewost, dat Enerjie jespart mot jän on hat domet jerechent, dat durch die langer Daach alljemeen wenijer Strom jebrucht jöv. Jespart jän es ever net esu vel, wie mer jedaat hat on die Diskussiunen över Vür- on Nodeel van der Sommerzit hürt on lest mer baal jeder Vröjohr on jedden Herst.
Vel Lögd beklajen sich, dat se met der Ömstellung net jot parat kon on morjes net jot us de Vedderen kon. Et jet esujar behopd, dat die Kö die iecht Zid no der Ömstellung van der Uhr wenijer Melech jän. Äver die Meesten sen doch vrueh, dat se sich noh Vierovend jet langer debussen obhalen konnen – dat heescht, wen’t Wedder met spelt, wat ju läst Jor net dek de Val wor.
Die iecht Joren beston die Sommerzit noch net en Dütschland, on esu kom et, dat die Lögd us oser Jäjend, die do werkten, en de Sommer jet langer schloffen konnten, dovür ever och ovends spoder Dehem worten. Esu had en Vrauw van herem Mann, den en Dütschland werkt, jasaht: “Derlevst feng hen met der dütscher Zit an ze werken on hät järren Vierovend met der Beljischer Zit”
Vel Jeschrej jov et och en die Huser, wu kleen Kender worren, die’t “Sandmännche”, “Flipper” oder en ander Kendersendung en de Fernseher kikken wollten. Dodurch jengen se ze spot änd Bett on sossen daars drop met möde Jesihter änd Schol.
De Beljier, die morjes vröh noh Dütschland voren vör ze jälden, kon et passeren, dat se vör jeschlosen Düren stonden.
No enisch Joren hat sich die dütsch Rejerung äver der Alljemeenhet ajepasst on esu beston die Nohdeler heukt net mieh.
Woröver sich äver noch jedes Kier de Kop zerbrochen jet, wann d’Uhr ömjestalt jet, es die Vroch, wannie mer en Stond verspeld oder en dobej krescht.
Do hat sich vör vel Joren ald den domolije Bürjermeester Kreins va St. Vith be en Intervieuw va Radio Luxemburg total verhespelt. He wor der Menung, dat mer en den Herst en Stond verlüst on es met dem Irrtum e vel Kappensitzungen erwähnt jen.
On wie dek hürt mer va Lögden kallen, die sich verdon han on entweder en Stond ze spod oder en ze vröh t’sonnes nor Mess jengen oder bej de Bäcker voren, vör Brütcher ze jälden.
Noch lästen Herst hat sich ne jonge Mann us oser Jäjend janz jewaltich jeirrt. He wolt met der Famillisch on sengen Vrönden e jrues Fest vieren, weil he vierzich Jor wor jän. Et wor alt alles jeplant: de Koch wor bestalt, e Lokal on och en Musikkapell worren reserveert.
Dat janz Fest solt de lästen Samstich vam Oktober jehalden jän. Wie Martin vör sengem Computer sos on d’Einladungen and schriven wor, veel hem us hederem Hemmel en, dat jöst de Samstich die Uhr ömjestalt jov on dat dodurch die Naht en Stond kurter wör. Dat wol hen zich on sengen Jästen äver net aandoon.
Esu hat hen kurterhand alles ömjeplant on hat dat Fest op Vrides ovends novüür jelaat. Mer hat jehuhrt, dat sich al Jäst jod amüseert han, dat äver die Meesten verwondert jevroht han, wiesu de Jeburtsdaach jöst op ne Vridich jeviert jov.
Ob Martin bes ewillen alt opjevallen es, dat seng Fete sujar en Stond langer hät duren konnen, wann hen den ursprönglichen Termin behalden häd, es net bekannt.
Also noch en kier vör all, die et net jot behalden konnen: änd Fröhjohr verspellen mer en Stond on die konnen mer dann en den Herst langer schloffen oder vieren.